سعودی عرب کے دارالحکومت ریاض میں ہونے والے اہم کابینہ اجلاس میں
سعودی ولی عہد اور وزیرِ اعظم شہزادہ محمد بن سلمان کی زیر صدارت پاکستان کے ساتھ مختلف شعبوں میں تعاون کو وسعت دینے سے متعلق اہم فیصلوں کی منظوری دے دی گئی۔ اجلاس میں دونوں برادر ممالک کے درمیان تعلقات کو مزید مضبوط بنانے کے عزم کا اعادہ بھی کیا گیا۔
کابینہ نے سعودی وزارتِ داخلہ اور پاکستان کی وزارتِ داخلہ کے درمیان سائنسی، تربیتی اور تحقیقی تعاون کے فروغ کیلئے دوطرفہ معاہدے پر دستخط کی اجازت دے دی۔ اس معاہدے کے تحت سکیورٹی، انسدادِ جرائم، جدید ٹیکنالوجی کے استعمال اور انتظامی امور میں تجربات کے تبادلے کو فروغ دیا جائے گا۔حکام کے مطابق اس اقدام سے دونوں ممالک کے سکیورٹی اداروں کے درمیان روابط مزید مستحکم ہوں گے اور پیشہ ورانہ مہارت میں اضافہ ہوگا۔
اجلاس میں سعودی وزارتِ صحت اور پاکستان کی وزارتِ قومی صحت خدمات، ضوابط اور ہم آہنگی کے درمیان بھی تعاون بڑھانے کی منظوری دی گئی۔ اس شراکت داری کے تحت ضابطہ سازی، ہم آہنگی، طبی تحقیق، صحت کے نظام کے انتظام اور جدید طبی سہولیات کے شعبوں میں مشترکہ اقدامات کیے جائیں گے۔ماہرین کا کہنا ہے کہ اس تعاون سے پاکستان کے صحت کے نظام میں بہتری اور جدید سعودی تجربات سے استفادہ ممکن ہوگا، جبکہ سعودی عرب کو بھی طبی افرادی قوت اور مشترکہ منصوبوں سے فائدہ پہنچے گا۔
کابینہ اجلاس کے دوران علاقائی اور عالمی امور پر بھی تبادلہ خیال کیا گیا۔ سعودی قیادت نے پاکستان کے ساتھ تاریخی، مذہبی اور تزویراتی تعلقات کو مزید وسعت دینے کے عزم کا اعادہ کیا۔ دونوں ممالک کے درمیان پہلے ہی توانائی، سرمایہ کاری، دفاع اور افرادی قوت کے شعبوں میں قریبی تعاون جاری ہے، جسے اب مزید ادارہ جاتی شکل دی جا رہی ہے۔تجزیہ کاروں کے مطابق یہ معاہدے نہ صرف دوطرفہ تعلقات کو نئی جہت دیں گے بلکہ خطے میں استحکام اور مشترکہ ترقی کے مواقع بھی پیدا کریں گے۔
